“Таны хандивласан цус 3 хүний амийг аварна” гэсэн уриатай цус хандивлах аянг “Хүний хөгжил, харилцааны ёс зүй, эрх зүй” хичээлийн хүрээнд ХИ 1а ангийн Ж.Алтансувд ахлагчтай баг 10 сарын 3-ны өдөр зохион байгууллаа. Цус хандивлах аянд нийт 60 гаруй багш, оюутан сурагчид оролцож эрдэнэт хүний амь насыг аврах эцсийн найдвар болсон цусаа хандивлах үйлст өөрсдийн  хувь нэмрээ орууллаа.

Сүүлийн жилүүдэд манай улсад  осол аваар, цусны хорт хавдрын  өвчлөл нэмэгдэж улмаар цусны хэрэгцээ ч нэмэгдэх болсон. Гэтэл өнөөдөр цусны нөөц цөөхөн хоногоор тоологдохоор байгаа юм.

Цусаа бусдад хандивлах нь эрүүл мэндэд муугаар нөлөөлнө гэх ойлголт олон нийтийн дунд байдаг ч эсрэгээрээ цусаа тогтмол өгдөг донор хүний бие эрүүл чийрэг, зүрхний шигдээсээр өвчлөх магадлал 30 хувь бага гэж шинжлэх ухаан нотолжээ. Түүнчлэн цусаа тогтмол өгдөг донорууд хэзээ ч цус багадалтаар өвчилдөггүй, харин ч цус алдалтыг тэсвэрлэх чадвартай болдог юм байна.

Хамт олноороо цусаа хандивлах аянд нэгдсэн Технологийн дээд сургуулийн багш, оюутнууд олон иргэдэд амь, амьдрал бэлэглэж чадна гэдэгт итгэлтэй байна.