Шинээр ашиглалтанд орсон хот хөдөөгийн хүнсний үйлдвэрүүдэд залуучуудын гавшгайч бригад илгээх, МХЗЭ-ийн илгээлтээр төгсөгчдийг ажиллуулах ажлыг зохион байгуулж байсан.Энэ үеэс мах, сүү, талх, чихэр-нарийн боов, исгэлт амтат ундаа, гурил, тоног төхөөрөмжийн засварчин мэргэжлээр ажилчид бэлтгэж эхэлсэн.

Ази номхон далайн орнуудтай харилцах Монголын нийгэмлэгтэй хамтран Тайвань улсын хөрөнгө оруулалтаар талх нарийн боов, мах махан бүтээгдэхүүний гадны хөрөнгө оруулалттай анхны 2 цехийг сургууль дээр байгуулсан. Сургуулийг бүтэц зохион байгуулалтын өөрчлөлтөнд оруулж шаталсан сургалттай мэргэжлийн сургалт үйлдвэрлэлийн төв болгох ажлыг биечлэн удирдаж гүйцэтгэсэн.

Энэ үеэс 8-р анги төгсөгчдийг хоёр, 10-р анги төгсөгчдийг нэг жилээр сургаж, мэргэжил боловсрол эзэмшүүлээд анхан шат төгсөгчдөд мэргэшлийн 2-4-р зэрэг олгож, тэднээс сурлага мэргэшлээр нь шалгаруулж дэвшүүлэн нэг жил сургаад дунд боловсролтой техник-технологич, мастеруудыг бэлтгэн гаргаж эхэлсэн. Шаталсан сургалттай мэргэжлийн сургалт үйлдвэрлэлийн төв шинэчилсэн зохион байгуулалтанд орсон цагаас эхлэн сургалтын төлөвлөгөө, хөтөлбөрийг шинэчлэн боловсруулж түүнд тохируулан сургалтын материаллаг баазыг бэхжүүлж анги, кабинетыг шинэчлэн тохижуулж, сургалт үйлдвэрлэлийн цехүүдийг шинээр байгуулж эхэлсэн юм.

Цэрэндэндэв овогтой Найдансүрэн (яамны орлогч сайд асан) 1967-1973 онуудад захирлаар ажиллаж, хүнсний үйлдвэрүүдтэй гэрээ хэлэлцээр байгуулж, үйлдвэрлэлийн дадлагын журмыг хэрэгжүүлэн ажиллаж, хүнсний үйлдвэрүүдийн дэмжлэгээр сургуулийн материаллаг баазыг бэхжүүлэхэд онцгой анхаарч ажилласан байна. Мөн түүнчлэн багш ажилчдад зориулж Шадивлангийн аманд зуслангийн 11 байр бариулжээ.

Хүнсний үйлдвэрийн яамны сайдын 1965 оны 06 сарын 28-ны өдрийн 89-р тушаалаар тус сургуулийн анхны захирлаар Цэрэндорж овогтой Пүрэвжав 1965 оны 07 дугаар сарын 01-нээс эхлэн томилогдож, захиргааны 24 орон тоотой ажиллаж мах, сүү, талх чихэр, гурил, засварчны мэргэжлээр 5 ангид 250 сурагч элсүүлж, 1965 оны 10 дугаар сарын 01-нд (хуучнаар санхүүгийн техникумын хичээлийн байрны баруун хойд жигүүрт) хичээлээ эхэлснээр сургууль анх гал голомтоо асаасан.